【裝修名人堂】 汪師傅 陳師傅 無間合作十多載 親力親為實戰取勝
2021年09月01日
0
28388
汪師傅，陳師傅於同一鄉下長大，千里迢迢來港建構自己的裝修夢，轉眼間已是十多年前的事。
陳師傅笑言：「二十歲開始做裝修，而家都五十一歲，所以都做咗三十一年。做咁多年當然鍾意裝修，我覺得有啲係遺傳嚟，我阿爺做裝修，阿爸又係，所以我都係有嗰啲基因，哈哈！」
親力親為 誠心接待工程
不少五十來歲已有自己裝修公司的師傅，都會轉為監工，但汪師傅、陳師傅卻認為親力親為才能令工程更好。「每單工程，我哋都係落手派，唔會只係行下企下，睇住啲細嘅做。裝修一定要咁，自己有落手，睇得會更加實。只係行下企下，就可能會有甩漏。」
兩人一直以誠實正直見稱，從他們對待接待客人的心態就略知一二了。「錢就賺唔完嘅，但工程就可以做得好，要識分配資源識計數。如果客人預算價錢可以做到，我哋人手夠我哋會接。如果我哋明知個價做唔到，我哋會預計到會爛尾，又點會為咗賺錢都強行做呢？」
「價錢啱，大家傾好，同你簽咗合約，代表已經佢信咗你，就一定唔可以偷工減料。真係要照做，唔好以為自己對裝修知得多過個客，就可以客人唔發現嘅情況下偷工減料。我哋要令個客真係對你有信心，『呢間公司都唔錯喎！』，呢個口碑嚟。」
「我哋做工程除咗賺錢，係要有成就感，做落去見到啲嘢做得好靚，手工好，我哋真係會企係度欣賞下自己嘅成品先出門口㗎，哈哈！所以我哋兩個對工程有好負責任，因為點都想做靚佢。我哋同一個時期工程唔係接到好多，但個個都好認真做，從來未試過俾客抱怨！」
三十載工程經驗 以實戰解決困難
汪師傅，陳師傅三十年的裝修工程經驗，加上位位資深的同鄉師傅團隊，由商業到會所，由豪宅和公居屋大大小小的工程都非常熟悉，對比其他裝修公司，他們根據多年閱歷，幫助客人單位解決間隔問題的事情並不少。
「試做過時代廣場一個單位，時代廣場個廁所出名細，開門都會撞到洗手盤，我同佢諗到個廁所點整，偷咗個廳少少位，廁所門改咗外面吊趟，結果好成功。客人話返我知，估唔到個廁所咁靚，上下層單位都冇咁做個廁所出嚟，人哋個個用超細洗手盤，我就可以做到個洗手盤好大，佢真係好開心。唔係個個師傅做得到，但我哋做到，因為有實戰，諗到做到。」
溝通為上
兩人就多年閱歷、實際施工經驗，加上設計及解難能力，切實地把客人對家居裝修的困難一一解開。「客人唔識裝修，先會交俾你，你當然要做好佢，但唔等於我哋做晒決定。」
有時很多裝修公司與客人的誤解，在於客人未必了解工程施工的不可能，而師傅未必會詳細解釋，又或是覺得做自己認為最好的方法，結果非客人所想，繼而不和，因此汪師傅和陳師傅多番重提「溝通」是裝修工程中的重中之重。
「重點係溝通，同佢傾偈，睇下佢要求乜野，透過我哋嘅經驗推測要求可唔可行，可行唔可行都要解釋俾客人聽件事，諗到咁做都要解釋到客人明白，唔好自把自為覺得啱就做，同佢講佢嘅要求未必做到，不如試另一個方法，我哋試過得。但記得，要交返俾客人做最後選擇，因為呢個係佢間屋。」
「記得『解釋』唔係打對台，打對台只會傷和氣，冇意思，一個單位唔係十日八日搞掂，最少都兩三個月，大家唔齊心，呢單工程就算做到，到時都會大家傷和氣。你要令到個客對你有信心同放心。」要讓客人覺得師傅其實與你站在同一陣線。
汪師傅和陳師傅一班團隊從不以花巧取勝，以踏實的工藝經驗，真誠的態度獲取客人的信任。「工程從來唔勉強接，接到就認認真真做，大家合作得開心，口碑就係咁嚟。」
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
