【裝修名人堂】 曾師傅 裝修家族經驗豐厚 工程調配極為靈活
2021年09月08日
0
35403
裝修父子班、兄弟班十分常見，勝於凡事好溝通，而今次受訪的三位師傅也不例外，三位曾師傅，男兒擔起家族傳統，投身裝修行，傳承一代又一代的家族裝修智慧。
「阿爺都有做師傅，三代人，爸爸認識咗裝修呢樣嘢，然後就開始返工地，接工程，跟住叔叔都入黎呢行，做水電泥水，然後到我，我哋全個家族分工合作。」
「爸爸都做咗三十年，叔叔都差唔多三十年，我就讀設計，由細睇裝修睇到大，而加我都跟埋工地有五年，幫手設計畫圖，所以其實係一代一代都進步緊。」
父親是管工，叔叔做泥水水電，自己則負責設計，加上一班合作多年的師傅兄弟班，老一輩有深厚手工工藝，後生一輩則追上裝修潮流，把室內設計融入裝修，完美掌控工程各個細節。
工程調配安排靈活合宜 效率大大提升
家族裝修生意的優勢除了不落於守舊，隨新一代的觀念為家居裝修注入新血外，工程安排調配更為細緻流暢，更是讓客人掌握工程更多。
「啲戶主有時工程會跟到好實，好怕工程唔同範疇負責嘅師傅唔同，東一忽西一忽，戶主有起事上嚟唔知搵邊個好，但我哋唔同。」
「我哋係屋企人，兄弟每個人都有自己嘅分工，所以我哋對工程嚟講，任何調動同埋個合作時間協調都比外人快，自己人唔洗下下就住，大家都知我哋係同一目標，就係做好個工程。」
「兄弟班都有自己嘅專業，一個地盤交到我哋手，其實每個範疇程序入面，都有幾個人一齊同戶主傾，唔會只得管工，有專業嘅人細節會解釋得比較清楚啲，個客會明。其實就係每一部份都有人跟進，每個部份都為客人一直服務。」
多年公居屋住家裝修經驗，使他們輕鬆掌控工程外在限制，調節出合適方案。「除咗協調自家師傅可以慳時間之外，我哋做咗咁多年，知道唔同屋邨裝修都有時間限制，合適調動嘅話，就可以做到唔噪得嘅時候就做冇聲嘅工程，有聲嘅工程就爭取係其他時間做，我哋工程就唔太受屋苑限制而停工，變相工程時間自然會快好多。」
工程優質與否在於自我要求 溝通細節加強客人信心
優質的服務不單來自經驗，更是師傅對自我的要求。而三位曾師傅格外真誠的細說他們裝修之道，他們身為師傅，好性格會做出好工程。
「做好師傅，個人手藝之外，最緊要性格。特別係第一次置業既戶主，客人係唔知道工序，做出嚟係點，同點解要咁做。而師傅唔應該覺得自己嘅專業唔需要同客人解釋咁多，而係要主動同佢哋溝通，解釋點解咁做，點解呢度需要花多啲工序、物料去做，做出嚟會有乜效果。你要講，客人先知，先明白，先有信心。」
「同埋做管工咁多年會知道，師傅嘅性格如果係比較溫和啲嘅人，做出嚟嘅手工比較好啲，急躁嘅師傅做出黎細節就冇咁好。例如遇到急躁嘅師傅，啲嘢一痴上去就話搞掂，你話唔得，佢就同你噪，有啲師傅性格比較好，和氣啲，叫佢做好啲佢都會做。」
「工程嘅成敗就係睇細節。我哋師傅都係自己人，業主睇完問可唔可以改，我哋都會經常幫個客跟住佢嘅意見重新做返，師傳之間係自己人易溝通，就唔會個客講完，大家都唔理。」
誠信靠行動 一單工程足以定成敗
曾師傅一家人於裝修業行走多年，舊客轉介的工程仍源源不絕，見證他們的信念無誤。
「做裝修係做服務，誠信就唔係得個口講嘅，要行動。我哋修裝修過程中重視誠信，講得出就一定要做到，買呢樣嘢就買呢樣嘢返嚟，唔可以偷工減料，所以誠信最緊要係行出嚟俾人睇。」
「肯定鍾意裝修㗎！因為做一個裝修工程，對我哋判頭、師傅同設計師嚟講，做好單工程等於出咗一個產品，呢個產品直接話緊你成功定失敗。如果你要成功嘅話，就要落好多心機落去。」
