【設計名人堂】 Sean 設計需不斷求新 追求美的過程中獲三贏方案
2021年09月15日
0
28848
不斷建造不同創新又美觀舒適的環境，是不少室內設計師的畢生目標。熱愛室內設計的Sean由工作到成立自己第一家公司，已為此目標奮鬥了十五年有多。
由酒店、健身中心、辦工室再到住家等領域，Sean一直都主理大單位的室內設計，主打當代風格設計，舒適而不乏精緻細節，同時因不同範疇項目也接觸過，因此從不受範疇上的限制，更把各項目的知識靈活運用到其他項目上。現今特別專注於住家室內設計上，受不少客戶的賞識。
「而家主要做六百呎至四千呎單位，住家為主，傾向contemporary多少少，但唔係極簡風格，住家因為係用嚟住，所以設計上一定需要有細節，要令屋企耐看，傢俬上有返啲造型，拼砌一啲特別嘅傢俬同細節位。」
「有個優勢係我哋有做酒店項目，所以設計住家方面會比較貼心，會考慮好多細節。例如我哋而家好多單位都會加設智能系統，方便客人嘅生活。」
「智能控制當中燈光係一個重點，因為燈光設計係其中一樣少人重視，但其實可以發揮得好好，改善到生活嘅範疇，例如燈光營造氣氛配合返場合，食飯同埋打機係要用唔同燈光設計，而根據對氣氛要求高嘅酒店設計經驗，我哋喺呢方面就好有把握。」
溝通了解客人所需 力臻展現完善設計
在憶述住家設計的過程中，Sean認為身為室內設計師其中一個重點是與客人的溝通，同時如何兼顧自己的專業。
「住家客嘅要求真要比較貼心啲，客人諗到新idea就會同我傾，會多咗時間溝通。同個客溝通得好仔細，每個位置都要同佢傾。」
「然後你會發現有樣得意位，有時我哋做設計唔係話我想點就點，始終會有一個客戶嘅要求，最基本佢有幾多人住，人數唔同，年齡層唔同，佢需要嘅設計都唔同，我就要諗點樣有返我公司嘅風格之餘，又要配合到每個客唔同既要求。」
「做咗十幾年，要有自己基本專業嘅判斷，無論客人好有主見，還是對裝修設計唔了解，你都要好肯定咁同返個客講呢樣出到嚟嘅效果係點，再幫佢諗一套好嘅方案。」
「而係呢個過程中，我需要清晰地展示我為佢構想嘅設計係點，為咗俾佢想象到未來屋企，所以我哋會有好多圖紙、效果圖，墨線，我哋仲有VR俾個客參考。」
「其實就係用盡方法拉近客人想象同我哋嘅設計。總之務求令到佢容易啲理解到嗰效果，有時齋講，你以為客人明但其實佢可能唔明白，所以『有圖就有真相』，希望大家睇到嘅嘢係相近。過往嘅客人放心交俾我哋之後，都可以保證同圖有八成甚至九成相似。」
「呢一個同客人溝通同互相信任理解嘅過程其實係好開心㗎，公司所做過嘅單位，每一個客其實到最後都做到朋友，都有轉介新工程俾我。」
Sean一直認為室內設計是要比客走得更前，更有先見之明，為他們提供合適方案。現今他不失自己的專業判斷，同時花心思向客人展視他心中所想，毫無架子只求於自己創新的設計中貼合客人心意。
兼顧三方要求 現實中找尋突破創新
花上心思時間於思考設計以外，Sean同時需要成為他的室內設計方案、客人與工程公司之間的橋樑，一直專注於室內設計的他在創業後就明白現實中各方面都必須要取平衡。
「以前好鍾意做設計，花好多時間喺設計上面，好想試更多新嘢。而家自立門戶，就起碼要抽返1/3時間做返管理，管理就包括公司嘅管理，同埋工程公司嘅對接。然後就會發現好多時師傅用佢哋常用嘅方法去施工，未必會願意試新嘢。」
Sean坦言香港裝修界於室內設計上傾向保守，有時客人與自己都同意的方案師傅未必願意嘗試，而Sean作為一個想要不斷求新的室內設計師，他一直尋求方法突破。
「其實做得耐，就明白點解出面師傅會選擇咁做工程，可能我哋以前做開大項目，覺得好簡單嘅細節，可能運用到住宅嘅時候其實好復雜，或者唔敢試一啲可能要做維修嘅嘢，所以變相而家出面好多成品就一式一樣，打安全牌，但我哋公司點都會想喺呢一個安全網踏出多少少。」
「而家妥協嘅位係唔會令到個設計咁復雜，但就用多啲唔同物料去拼砌特色設計，去唔同地方搵最新嘅物料試，然後用我哋設計技巧令到完成品出到嚟冇咁大眾化，有與別不同嘅感覺。」
「其實最簡單係物料上轉變，再者顏色唔同，甚至比例唔同，都可以帶到唔同嘅感覺，但就要考慮可唔可以符合到香港師傅嘅水平去做，令個師傅做到之餘又有一啲唔同嘅效果。」
「例如客人想要火爐，我哋就會同工程公司夾，可能有啲係用真嘅火爐，有啲就搵蒸氣火爐，喺個客嘅有限空間內同佢諗計仔。」
「又例如油漆，香港多數係用噴或者掃，但我哋喜歡好似外國咁轆一啲紋理上牆。首先成本唔係好高，但出嚟牆身凹凸效果可以令間屋有質感上有唔同，另外又係師傅做到嘅範圍。其實就係不斷試，不斷了解同平衡創意同師傅能力。」
「真係要願意踏出一步去試，去同師傅商討。直到而家已經有唔少合作嘅班底，有能力又肯試嘅師傅。用設計去就佢哋同時我要滿足到個客，就係為咗俾一個靚嘅完成單位客人。」
現實與創新之間不斷拉鋸，最終只為用盡方法給客人一個美好的家居。兼顧設計及裝修，也努力和客人溝通建立信任，能感受到這份熱誠的客人一直有增無減，身任室內設計師兼老闆的Sean未來仍會繼續堅持建造不同創新又美觀舒適的環境。
