【裝修名人堂】 黃師傅 工程經驗 設計概念完善融合 細心留意客人生活動線
2021年09月22日
2
29122
「逆市我哋冇受影響，因為我相信只要保持對自己心中裝修嘅宗旨，就會冇問題。」
「而我哋心中嘅宗旨就係幫客戶完成佢心目中嘅家。」
溫文和善的黃師傅堅定地說出每個裝修戶主希望裝修設計公司能做到的要求，而十多年來他亦如此實行。
工程經驗與設計完善融合
黃師傅自小接觸裝修行業，由家人的薰陶下他也投身了裝修行業已十餘年。木工出身的他，到自己做判頭承接設計公司的工程，再開設自家的傢俬廠房，數年後，黃師傅毅然決定自己成立設計公司。
「工程公司接嘅單預計唔到，因為通常都係承接嘅設計公司嘅單，都有四五間設計公司俾單我做，做到咁上下，就會覺得想有自己嘅客人，想自己可以掌握得多啲，自己親身去了解客人所需，所以決定自己開設計公司。」
「之前接設計公司嘅單，係成間屋接，成間俾我哋做，所以成個流程我哋都好熟。」黃師傅透過設計公司的工程，一邊學習設計技巧，一邊認真對待工程，更經常研究多個設計案例，習得一身設計技能，熟知流行室內設計風格。
「學到設計嘅嘢之餘，畢竟我係工程出身，有啲乜設計施工上可行，有啲乜係施工上唔可行其實我係知道，亦都好熟，所以唔會天馬行空，要踏踏實實得嚟夠靚，亦都可以好好掌握同管理成個裝修工程進度。」因此，黃師傅的設計公司優勢在於融合工程經驗與設計，以最踏實的根基，開發創意。
觀察入微 細心留意客人生活動線
除了多年踏實的根基，為了能完成客戶心目中的家，「觀察入微」也是黃師傅所認為是必要的一點。
「首先同客人溝通好，知道佢有乜要求，生活習慣，再設計俾佢，細心解釋返咁設計嘅原因。細緻到你設計個櫃裡面，就要諗佢有幾多件長身衫，要有幾多個櫃桶，配合返佢嘅生活需要，因為傢俬好重視客人將來使用嘅方式，儲存同使用。」
「其實有時客人見到個設計覺得問題，例如有客會問個櫃嘅設計同佢哋諗嗰個方案點解有啲差別嘅？」
「每個客人係設計之前，都會對個單位有空間感上大概嘅認知，可以話到俾你聽呢度想要個點樣嘅櫃，而落實去行係我哋工作。作為把關嘅我哋，咁樣設計其實有原因。可能係因為你訓覺起身會撞到其他嘢，可能諗到你出門口拎衫會唔會唔方便，呢啲就要解釋返俾客人聽，其實我哋已經幫你諗埋啦。」
了解客人的生活動線、細節與習慣，黃師傅設計家居時一直以來有一個習慣。「其實係試下自己腦海走入個空間感受，自己行一次，例如你會唔會撞到，你出入門口會唔會有個位可以坐喺度換鞋，個櫃會唔會做一個坐墊坐得舒服啲等等，幫客人喺個腦海入面生活一次。就會知道有乜係便利生活，有乜唔係。」
本著為客人思前想後的心 無懼艱難開闢新路
黃師傅的設計公司開業時間雖不長，要開啟新客源無礙是一大挑戰，但他其實已有合作多年經驗豐富的工程班底，他回顧一路以來在開闢新路也面對同樣困難，但仍能突破，所以他並不擔心。
「講人生覺得比較困難嘅事，就係開傢俬廠。啱啱開嘅時候，要用好多方法搵多啲客人啊，設計師啊落單，例如俾少少拆頭，吸引佢哋試一試我哋間廠，試過自然知道我哋手工好，覺得正嘅佢又會介紹俾朋友。就係咁，都俾我哋捱過咗。」
「今年開始自己搵客戶，其實都係好大挑戰。不過而家過咗大半年，收返嚟嘅成果其實好唔錯。有客人裝修完個感覺好滿意，佢都話如果佢有朋友裝修會介紹俾我。我諗只要肯努力，夠經驗，真心幫客人思前想後，點都可以捱得過，點都會有人欣賞。客就係咁儲返嚟。」
真心幫客人思前想後，黃師傅一直如是，風雨不改踏實前行，因為他們的宗旨就是幫客戶完成心目中的家。
