【設計名人堂】Katie 引入英國專業室內設計概念 精心完善工程優質體驗

於英國修讀室內設計的Katie，回流香港便成了室內設計師，現已入行十多年。於英國讀書的經驗讓Katie於香港市場一直佔盡先機，由蚊型單位到豪宅Katie亦負責過，也瞭如指掌。

英國室內設計專業 深入透徹了解單位結構需要

「喺英國讀設計，因為科目同建築有相關，所以會學到結構嘅事，香港設計師學徒可能需要一邊做一邊碰壁去學，但我要對於建築結構有認知，加上喺英國讀書時都一直學緊最新嘅軟件，所以其實都比一般香港裝修走得前一啲。」

除了學術知識外，Katie知道室內設計從不只是粉飾表面，更是要思考細緻入微，考慮單位本身的結構。「其實唔係識畫圖就可以係好嘅設計師，客人將單位交俾你去設計，你需要了解工程要做啲乜嘢，客人需要乜嘢，你甚至需要安排一個主題，由嗰個主題去演變成個計劃出嚟。」

「仲有唔好忘記最基本嗰樣結構，究竟夠唔夠力，甚至個設計師要同師傅用好專業嘅角度去講解件事，究竟做唔做到，應該點做。」

「對單位嘅真實情況考慮都唔可以少，我哋去到地盤，一嚟就可以知道邊個位啱邊個位唔啱，有啲乜嘢要注重嘅地方，有冇結構性嘅爆裂，漏水等，甚至有冇一啲隱患。果啲嘢我哋睇得特別多，特別容易去知道喺邊度可以搵得到呢啲問題，呢啲就係我哋專做住家工程而得嘅專業知識。」

放下身段 以客為本 方為好設計

才學豐厚的Katie，設計能力優異也兼備工程知識外，然而對室內設計她別有一番看法。

「由初初做室內設計，當然對於設計好有幻想，好有抱負，想設計出好多最靚嘅單位，但經過對住真正嘅客人同單位咁多年，就慢慢會知道耹聽同責任先係裝修設計嘅重點，甚至你可以從中搵到樂趣。」

「因為每間屋有自己長處、短處同需要。而客人先係用家，室內設計師同其他設計唔同，最忌係只考慮到美觀。客人嘅出發點同你唔同，當然佢哋都想間屋靚，但用得方唔方便先係最重要嘅事。每設計一個單位，其實係我心入面美感同實用都喺度拉扯緊。」

「曾經有個客搵我地，佢有張好靚嘅實木餐桌，然後俾咗個題目我哋：『禪』。要我哋幫佢諗點樣令間屋有『禪』。由張餐桌開始，一路諗，諗到成間屋嘅設計出晒嚟。」

「過程入面，設計一開始客人都話ok，咁我哋就雄心壯志，後來我哋越諗就發得越大，大就一發不可收拾，諗一啲好大好空泛嘅理念出嚟，結果個客提返我有啲實用嘅位其實未諗完。嗰下就明白，設計師唔應該太沉迷於自己嘅靈感，而忽視客人真正需要。」

與客人攜手合作時，除了不要過份依賴自己的靈感外，配合客人才是真正室內設計之道。「就算個客揀嘅物料你未必喜歡，但要做嘅並唔係堅持自己，而係配合，因為嗰個係佢屋企。設計師要做嘅事係令到佢揀嘅嘢可以融入佢屋企，而且要夾得靚，對得起你對美嘅追求。比起你只放自己鍾意嘅嘢一定更難，但咁樣先係真正嘅室內設計師。」

貼心裝修體驗 加強客人信任

Katie謹慎而慢工細貨的個性，與她公司的理念不謀而合。為讓客人更加安心他們的工程品質，提供多種方案令客人整個裝修體驗也感到完善貼心。

除了有一班長年合作的專業師傅團隊外，Katie公司深知客人對裝修公司的不信任來自未了解公司的能力便要先付費的不安，因此制定了市場罕見但有利於裝修戶主的服務。

「我哋知道呢一行最恐怖係先付款後工作，客人會心裡面諗究竟呢間公司俾啲乜嘢我？而作為設計師嘅我知道，睇單位相其實睇唔到單位真實面貌，客人未必會信。所以我哋選擇改咗常規嘅做法，我哋訂金只收$100，做完一part先收一part嘅錢，分九次收錢，每一part都係做完咗之後，俾客人驗收咗先付款，客人就唔擔心。」

「呢個亦到係我哋對自己手工嘅信心嘅表現，我哋相信每一part客人都會滿意。我亦都希望客人，每次驗收可以提早發現佢覺得有唔舒服嘅位同我哋講，我盡快去處理咗佢，咁我做下一部份嘢先係最理想，否則遲啲分分鐘唔可以再轉。」

除了金錢外，Katie以設計師身份，亦以自己的方法提升客人的安心感。「每一單工程我哋要確定好晒，物料、櫃、設計，全部嘢確認晒先開始做，咁就唔會發生開工後先嚟問個客呢度點嗰度點，令客人後悔嘅機會少咗。」

「同埋工程順暢好多，定咗就唔會點改，雖然前期時間變多，不過客人都會覺得未收錢就咁認真傾咁多嘢，就會覺得有信任。」

這一種香港較少見的穩健派且具專業性的工程體驗令Katie與客戶們結下了不少良緣。「我仲好記得返香港之後第一單job，自己一個乜都唔識好緊張，但客人對我嘅專業非常信任。就算傢俬佢去第二度訂，佢都想我出個設計俾佢去訂造。客人結果非常滿意，之後翻新都會想用返我幫佢揀嘅色，要問返我色號。」

「有時同客人相遇，花咗好多心思同佢哋傾，就算中途大家傾到『起晒弶』，結果都會成為朋友，因為我哋真係好認真對待客人同單位，我哋相信客人會感受到。」