【裝修名人堂】 許師傅 經驗豐厚 實力取勝 踏實照顧客人所思所想
2021年11月10日
0
35371
裝修是工藝，是經驗，從不需要花言巧語去包裝。許師傅行年四十有多，沉默寡言卻是滿身裝修「武藝」。
當年許師傅尚在年輕時已投身建築業。「細個去跟啲師傅入行，以前喺鄉下做，就做起屋嘅。」為了生計，可能有不少人會選擇建築及裝修業，但堅持二十年有多的人並不多，許師傅就是其中一個。
「初初入去呢行，做雜工乜都做乜都要試，做做下就會科科都掂。後來九幾年就嚟咗香港，開始自己接單，因為樣樣都識所以都做得唔錯㗎。」肯學肯捱自有成果，望見香港的商機，許師傅隻身來到香港打拼，把多年建築經驗引入住家裝修工程中。
實力取勝 踏實照顧客人所思所想
由僅面對工地默默地做，來到香港就要獨力承擔工程管理，面對各種客人，許師傅相信，比起花言巧語令客人安心，行動才是更正路的方法去提升客人信任。「有時客人唔識裝修嘅嘢，要同佢哋溝通多啲，不過最重要都係做得到，咁做到俾佢哋睇咪得。」
「做師傅呢，千祈唔好成為嗰啲『講就乜都得，但到做嗰下先話做唔到』嗰啲人。自己最清楚自己識幾多，做到幾多，做唔到客人要求我一定同客人講，咪諗其他方法做，但唔係『充大頭鬼』。」
「客人擔心明嘅，例如佢哋問你點做防水，其實都係擔心師傅會呃佢唔識工程嘢。咁我就會影相拍片，浸夠兩晚，證明試咗水冇問題，佢哋就唔洗擔心。」或許許師傅較為寡言，但知道自己實力並踏實實踐外，他亦不忘用自己的方法照顧客人所思所憂。
珍惜客人家居 以專業配合客人喜好
對客人除了誠實外，師傅還需要細心。一切基本需要小心謹慎的工程部份，如防水，許師傅根據經驗早以得心應手，他更著眼的是細緻入微的部份。「油漆最要小心。一撞落去就會撞花，所以要好好保護。」
珍惜客人的家，其實也是一種避免增加的成本的方案，凡事一開始就處理好，就能減少修補的時間，金錢與精力，少一件事需要客人煩心，許師傅早以為此思考過。
有時許師傅遇到客人各種意見，他亦盡力配合，因為他知道客人的家居除了要有最扎實的結構外，最重要還是符合客人的心意。
「好多嘢其實都係睇客人想唔想咁，我好易話為。就好似最簡單嘅裝抽油煙機喉，客人本身冇乜要求，咁我就用返一貫做法，用鋁窗色嘅玻璃膠，客人唔喜歡，得！當然可以改啦，佢屋企嘛，最緊要佢鍾意。美觀就各花入各眼，只要客人肯定我手勢做得好就得。」
經驗豐厚 以扎實本領獲客歡心
來港二十年有多，許師傅由小型到中型單位，局部到全屋裝修工程都已完成過無數遍，仍然用心做好每個單位。「用心做每一個單位，其實都係為咗客人覺得我好，我有料，佢哋就會轉介客人俾我，呢個係打好個口碑嘅方法，就係唔需要講咁多，專心做好每件事。」
「我覺得裝修有時係睇人緣，但你問我覺得點解客人揀我，我諗，大概係貪我老實啩，哈！」裝修工藝實踐在許師傅心中是最重中之重，無需巧言令色，有麝自然香，何須迎風立，自然而言就備受客人所敬重。
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
