辦公室都要大掃除！4樣好重要但只有你自己先清潔到的工作物品
2022年01月30日
0
165921
年廿八仲有幾多人洗邋遢呢？通常都係交個波畀阿媽搞掂佢。除咗屋企之外，有冇諗過其實office都應該要洗邋遢？當然唔係叫你咁偉大幫手洗公司個廁所啦，唔好搶咗清潔姐姐份工。日理萬機嘅香港人，留喺辦公室嘅時間分分鐘長過屋企，就算而家好多人都WFH，一樣都好多地方係要清潔嘅。而呢啲地方阿媽幫你唔到，清潔姐姐亦唔敢掂，你自己都成日忽略，但有機會每一日都影響緊你工作效率。
諗唔諗到係咩？趁住牛年最後嘅日子，跟裝修佬一齊清清佢，新一年仲唔工作順順利利？！
1. 電腦鍵盤 滑鼠 / laptop keyboard and mouse
硬件嚟講，電腦係現代人嘅好朋友，應該冇咩邊個返office係唔使用電腦。加上而家做咩都電子化，個個開會都拎埋部laptop成個office周圍走。先唔講laptop底掂過嘅公家檯面有幾污糟，淨係個keyboard嘅含菌量都有機會高到嚇親你，仲有佢個好朋友mouse呢？
其實要清潔真係唔難，如果你有用鍵盤保護墊就更加簡單，就咁用酒精抹一抹就得。不過如果你個鍵盤有輕觸性按鈕，就要小心留意某啲清潔劑會唔會對佢嘅敏感度造成影響。
輕鬆清潔鍵盤方法：
- 將鍵盤面向下，輕輕拍打等鬆散嘅灰塵、零食碎屑跌出。
- 用壓縮空氣波波 (有人叫洗耳球、皮老虎，影相部同事通常都有) 吹出按鍵之間嘅灰塵，再用小筆掃輕輕掃走。
- 用布沾肥皂水或酒精，輕輕擦拭鍵盤和按鍵的表面。
而家市面上有啲清潔泥、清潔軟膠，用少黏力將窿窿隙隙嘅灰塵黐走，有需要都不妨一試。
2. 已經冇墨嘅筆
拿，唔講你都唔記得啦。雖然樣樣嘢都電子化，但簽吓文件都要有筆嘅。因為太少用，到要用嘅時候先發現墨水乾哂，擺埋一邊唔理，下次又重蹈覆轍。正常嘅，日日咁多嘢做，邊到得閒理啲筆仲有冇墨呀？
除非你係老師要日日改簿，又或者你係畫家要用素描筆畫筆，否則普通打工仔已經唔太需要用紙筆啦。一枝黑色一枝藍色，加多枝三合一彩色已經好夠，多不如少嘛，冇墨直接換一枝就得。至於螢光筆呀，鋼筆呀，就因工作而異啦。如果你作為老細，簽名多過jog notes，咁緊係要擺多幾枝鋼筆啦！
3. 電腦嘅「下載」文件夾
冇錯，係名叫「Download」嗰個file。整張圖又要下載，阿姐send個file嚟又下載，望下「下載」個文件夾入面有幾多已經唔重要嘅檔案一直罷住你電腦個storage？
當好趕嘅時間，直接用下載嘅file再edit，變咗重要文件又唔擺返係重要嘅位置，到要搵嘅時候又搵唔到，真係好煩㗎！
喺過年前重新審視吓download呢個file入面有咩有用，有咩可以移施到「資源回收筒」啦，方便自己新一年嘅工作啦！
4. last but not least — Your EMAIL !
無論係咪WFH都好，相信大家個email都非常熱鬧，正式又好唔正式又好，幾乎任何事情都要經email溝通，用吓用吓個email就爆咗，到時都唔知del咩好。
雖然Email係好重要嘅記錄，但總有啲N年前已經冇效冇意義嘅Email可以同佢講再見。其餘Email應該按需要分門別類，重要文件加返粒星星，當要搵返某個Email時都唔使search到天荒地老嘛。
當然啦，最重要仲有你混亂咗一整年嘅思緒，趁住假期整理好自己嘅思想，斷捨離除咗係個人物品之外，清晰嘅諗法同目標都係幫助自己工作順順利利嘅關鍵呀！
本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。
關键字：
