【修佬教室】裝修遇過極亂情況 屋企雜物點處置?
2023年07月27日
0
11772
好多人裝修都鍾意搵啲鬼火咁靚嘅設計圖參考，然後搵設計公司出圖裝修，裝完之後就發覺。靚嘅並唔係單位，而係張圖。
為免惹仇恨，相片例子就留番*上堂展示，唔會公開貼啦。但可以同大家分享番三個小貼士！
第一：要識睇設計圖
你有執過相就知道。調一調色、按一按廣角，將空間感倍增係幾咁容易。設計圖就係做緊咁既野啦！仲有其他移除雜物等等招式，令你覺得屋企因為佢既設計而成功大變身。錯！錯！錯！靚既真係只係設計圖。到完工現場睇睇真實情況吧！
第二：要識分析自己間屋點解亂
修佬張圖叫大家搵不同，其實係想大家留意一下，自己間屋係點樣由亂入治。好多人都鍾意增加儲物空間，冇用架。如果你間屋之所以亂，並唔係因為一D可以擺入櫃既野。你越多櫃，空間就越少，咁間屋就只會越亂！
第三：唔好自己會改變
好多人有個美好既幻想，覺得將間屋裝修靚靚後，就會勤力執屋，保持間屋嘅美好狀態。千祈唔好咁諗。你唔會架！
呢個唔係悲觀，係務實。如果你覺得自己會改變。改咗先裝修。唔好期望自己會隨著駛左幾十萬，就會改變生活習慣。
本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。
