【House730】千奇百趣｜灣仔Woodis超長平台 長過全港最長巴士
2025年10月07日
0
13067
文章由House730提供｜
如果你屋企有個長達15米嘅戶外超長平台，你會點用？體操選手可以日日喺平台打側手翻；運動型嘅你，可以日日屋企練跑；寵好多毛孩嘅你，畀佢哋有個私家活動區，隨時隨地自由奔跑嬉戲。又或者整個戶外用餐區，閒時招呼親友去聚餐、燒烤，唔使成日爭會所燒烤爐。愛搞花花草草嘅你，來個戶外私家園藝區，屋企變花墟。
灣仔兩年樓花新盤
鬧市嘅新盤，係咪一定又細又屈質？灣仔活道有個新樓盤，平台一啲都唔細，仲大到可以放得落全港最長嘅巴士。呢個新盤叫Woodis，仲係樓花，要2年後先起好。位於灣仔商業核心區，地盤唔夠一萬呎，以前係上世紀嘅三幢舊樓，恒基地產係2010年開始收購，整合咗7年先統一哂所有業權發展，整個項目可建樓面約8萬呎。咁珍貴嘅市區地，會起巨型平台單位？
成幢樓會起167伙單位，有66%係兩房單位，即係110伙，實用面積由343至431方呎，係最多戶型嘅單位。一房有22伙，實用面積約282方呎。呢兩種間隔加埋，佔全盤近80%單位。頂樓有三個由540方呎到1,016方呎單位特色單位。鍾意戶外空間，三樓全層有7個連平戶特色戶，最大一個平台，有成近千呎。
900幾呎私家平台點用好?
三樓全層都係連平台，但平台面積不一，最細平台面積51方呎，最大一個係F室單位，單位在室內面積393方呎，戶外尚有個916呎大平台。巨型平台長達15.5米，寬度都近5米，以目前全港最長巴士車身12.8米計，呢個超長型平台，夠放全港最長巴士。確實，係鬧市有個巨大私家平台，用嚟擺放戶外家具、健身器材，或者園藝、養寵物，甚至可打造私人花園，隨時隨地都可輕鬆一下。
戶外瑜伽、健身區
平日繁忙嘅都市人，就算搵到時間，都可能無空間做運動。呢個大平台會唔會成為戶外瑜伽或者健身區？夜晚唔使一定要搵24小時fitness center，足不出戶都可以放鬆下筋骨。體操選手想打側手翻？根據一般體操同街頭表演估計，一個側手翻大約需要1.5米至2米長。平台有15米長，打10個側手翻都冇問題。
毛孩私家樂園
寵愛毛孩嘅住戶，戶外整個寵物活動區，分區放置隧道、跳台、攀爬架等設施，毛孩盡情奔跑嬉戲，磨練體能。主子玩得開心，主人喺戶外設置用餐區，同老best齊齊聚餐燒烤，唔一定要北上先至有得玩。除咗毛孩，家中有小朋友，都可以將戶外平台打造成私家會所，大人充電，小朋友放電，最啱一家大小嘅最佳位置。
「五門歸心」點放家具好?
雖然有個超長平台，除左平台戶，其他單位間隔啱唔啱自己，都要細心睇吓。好似分層標準單位，有啲單位間隔「五門歸心」，如5樓到12樓，15樓到23樓，25樓到29既C單位，係兩房單位，但屋內五度門包括大門，廚房門，廁所門，兩間睡房門，都向正客廳，要善用空間，放置家具就比較傷腦筋。
